ايش دي الشنط كلها ياسيدي وكمان جايب معاك ميزان؟ ليه ده كله؟ هدا ياستي عشان أبغى أوزن الشنط كلها اللي اخدتها من المكتبة واشوف اقل وحدة في الميزان ونشتريها عشان ياستي وزارة التربية والتعليم قالت انه الشنط هية السبب في تعب اولادنا وبناتنا لما يجوا يشيلوا الشنط على ظهورهم او يداتهم وقالت كمان انه الاوزان لازم تكون محددة بالنسبة للابتدائي والمتوسط والثانوي، ومتى قالت ده الكلام؟ اهو قدام عيونك في الجريدة مكتوب (أطلقت وزارة التربية والتعليم حملة توعوية موجهة لطلاب وطالبات التعليم العام وأولياء الأمور بعنوان «نحو حقيبة مدرسية أقل وزنا.. من أجل صحة أفضل»، تهدف إلى نشر الوعي بين الطلاب وأولياء الأمور بالوزن المثالي للحقيبة المدرسية، والتعرف على بعض الإرشادات الصحية الواجب اتباعها عند اختيار واستخدام الحقائب المدرسية لكل المراحل التعليمية).. وايش يعني ده الكلام ياسيدي؟ يعني ياستي انه الشنطة الغلبانة هيه السبب في تعب ظهور بناتنا واولادنا من شيلها مو الكتب المدرسية اللي بتوزعها وزارة التربية والتعليم وهيه عارفة انها بتوزع لكل مادة كتابين غير الكتاب الرئيسي هدا غير طلبات حصص التربية الفنية والتدبير المنزلي وغير الملازم والملخصات اللي بيطلبها اغلب المعلمين والمعلمات واللي بيشتروها الطلاب والطالبات من المكاتب عشان كده بقول لحبايبنا اللي في وزارة التربية والتعليم اول شي عشان نحافظ على صحة ظهور واكتاف اولادنا وبناتنا انكم تبلغوا المعلمين والمعلمات انهم ما يطلبوا من الطلاب والطالبات شيل كل الكتب لانه في بعض المعلمين والمعلمات يحبوا ينكدوا ويفرضوا رايهم على الطلاب والطالبات انهم يجيبوا كل الكتب والا ترى نعرف نحاسبكم كيف، وتاني شي ياليت تبلغوا المعلمين والمعلمات انهم يجهزوا جدولهم الدراسي من بدري مو يجلسوا الطلاب والطالبات شايلين كل الكتب كم اسبوع على بال ما يتفقوا على جدولهم الدراسي وعلى بال ما يتفقوا على جدولهم الدراسي يكونوا اولادنا وبناتنا راحوا فطيس واتكسرت ظهورهم وكتوفهم. والشي الاخير وهو المهم الين متى حنجلس على حكاية الكتب والعالم حولنا بيطور؟ متى حنستغنى عن الكتب ويرتاحوا اولادنا وبناتنا من شيلها وحطها؟ متى حنسمع انه وزارة التربية والتعليم وزعت لكل طالب وطالبة (CD) او ايباد منسوخ فيه كل المواد اللي يحتاجها في دراسته، وحكوماتنا الحمد لله ما قصرت بتدفع وتخصص آلاف الملايين من ميزانيتها للتعليم.. وارحموا من في الارض يرحمكم من في السماء وعيشوا كتيييييير تشوفوا كتيييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com